Þurfum að ná fram nauðsynlegum viðhorfsbreytingum

October 25, 2016, 5:59 am

≫ Next: Fyrrverandi nemendur VMA Íslandsmeistarar í málmsuðu

≪ Previous: Aðstoð við námsval í tölvustofu

$

0

0

Þar sem vetrarfrí var í framhaldsskólunum á Akureyri, VMA og MA, í gær, þegar konur um allt land efndu til kvennafrídags ákváðu konur í báðum skólum að efna til sameiginlegs baráttufundar á Ráðhústorgi í gær, þriðjudag, þar sem ávörp voru flutt, sungið o.fl. Kröfuspjöld voru á lofti þar sem jafnréttis – ekki síst launajafnréttis – var krafist, en á það var lögð mikil áhersla í barátturæðum kvenna á kvennafrídaginn sl. mánudag. Ein þeirra kvenna sem fluttu ræður á fundinum á Ráðhústorgi í gær var Hildur Friðriksdóttir, sem starfar á bókasafni VMA. Hildur Hildur vann meistarprófsverkefni sitt við HA sl. vor um svokallað hrelliklám en hún beindi m.a. sjónum að því hvernig íslensk löggjöf skilgreinir hrelliklám og jafnframt innihaldsgreindi hún íslenskt hrelliklám á vefsíðunni Chansluts.com. Eftirfarandi ávarp flutti Hildur á útifundinum á Ráðhústorgi í gær: Kæru baráttusystur, Við erum hér samankomin í dag til þess að minnast þess, að þann 24. október, árið 1975, lögðu fjölmargar konur niður störf í þeim tilgangi að krefjast rétt¬inda og launa til jafns á við karla. Við erum sömuleiðis hingað samankomin í dag, til þess að benda á þá sorglegu staðreynd að nú, 41 ári síðar, séum við konur enn í þeirri stöðu að þurfa að berjast fyrir þessum sömu réttindum. Réttindum sem ættu að vera algjörlega sjálfsögð og voru fest í lög árið 1961, en með þeirri lagasetningu var stefnt að því að fullum launajöfnuðu yrði náð árið 1967. Í dag er staðan hins vegar sú, að meðalatvinnutekjur kvenna eru ekki nema um 70% af meðalatvinnutekjum karla og kannanir sýna að kynbundinn launamunur innan fyrirtækja og stofnana er á bilinu 7-18%. Og svona áður en einhver fer góðfúslega að reyna að benda mér á að það eigi sér allt saman eðlilegar skýringar, þar sem karlar vinni jú alla jafna lengri vinnudag, vinni meiri yfirvinnu og að við konur séum bara ekki nægilega duglegar við að bera okkur sjálfar eftir launahækkunum, þá er best að undirstrika það, að þegar talað er um kynbundinn launamun er átt við þann mun sem er á launum karla og kvenna sem ekki er hægt að útskýra með ólíkri menntun, aldri, starfsaldri, starfshlutfalli, starfsstétt, yfirvinnu eða vaktaálagi og verður því ekki skýrður á annan hátt en þann að kyn ráði þeim mun. Þannig að þrátt fyrir það sem ýmsir vilja halda fram er kynbundinn launamunur í íslensku samfélagi staðreynd! En hvers vegna skyldi okkur ganga svona illa að vinna á þessum augljósa vanda sem kynbundinn launamunur er? Einhverjum kann kannski að þykja það ótrúlegt, en kynbundinn launamunur verður ekki til í einhvers konar félagslegu tómarúmi. Með öðrum orðum þá á hann sér í raun mjög eðlilegar skýringar. Kynbundinn launamunur er nefnilega ein skýrasta birtingarmynd þess að konur eru ekki metnar til jafns á við karla í samfélagi okkar. Þannig að ef við ætlum okkur raunverulega að laga þennan launamun þá verðum við að horfast í augu við vandann út frá mun víðara samhengi. Horfast í augu við það að kynbundinn launamunur er mjög eðlilegt afsprengi þess kynjakerfis sem við erum alin upp við. Kynjakerfi sem sendir okkur strax frá unga aldri mjög skýr skilaboð þess efnis, að það sem er kvenlegt er minna virði en það sem er karlmannlegt sem aftur skilar sér í því að konur og þar með hefðbundar kvennastéttir fá lægri laun en karlar. Þannig að það er alveg sama hversu vel við tryggjum jafnréttið samkvæmt lögum. Við munum ekki brúa þetta launabil fyrr en við erum tilbúin til þess að tækla kynjakerfið í heild sinni og hrófla í leiðinni við rótgrónum hugmyndum um kynin og kynhlutverk og ná þannig fram nauðsynlegum viðhorfsbreytingum sem eru forsenda þess að hægt sé að mjaka hlutunum í rétta átt. Og þá verð ég að koma með eina játningu. Það getur verið mjög þreytandi að halda á lofti merkjum jafnréttisbaráttunnar. Það er þreytandi vegna þess að í kringum okkur eru alls kyns einstaklingar sem fara að dæsa og ranghvolfa í sér augunum um leið og jafnréttismál ber á góma. Einstaklingar sem draga í efa fyrirbæri eins og staðalmyndir kynjanna, kynjakerfið, klámvæðingu og kynbundið ofbeldi. Einstaklingar sem afgreiða jafnréttisbaráttuna sem óþarfa væl í konum, sem einhvers konar forréttindabaráttu eða jafvel sem fórnarlambsvæðingu kvenna. Einstaklingar sem fordæma femínisma og allt það sem sú mannréttindabarátta stendur fyrir. Ég stend mig því oft að því að þurfa jafnvel að herða upp hugann áður en ég blanda mér í umræðu um jafnréttismál og velta fyrir mér hvort ég raunverulega nenni að taka slaginn. Því eins sorglegt og það nú er þá getur þessi umræða verið bölvaður slagur - umræða um jafn sjálfsögð og eðlileg réttindi og þau að kynin séu metin jafnt að verðleikum. En hér stend ég frammi fyrir kynslóð sem svo sannarlega hefur sýnt það að hún þorir, hún getur og hún vill taka slaginn. Kynslóð sem með aðstoð internetsins og hinna ýmsu samfélagsmiðla hefur verið dugleg við að vekja athygli á margvíslegu misrétti s.s. kynbundnu ofbeldi og launamun svo dæmi séu nefnd. Kynslóð sem hefur staðið fyrir baráttuaðgerðum á borð við druslugönguna og Free the nipple þar sem fjölmargar framhaldsskólastúlkur ákváðu að leggja sitt af mörkum til þess að gengisfella fyrirbæri eins og klámvæðingu og hrelliklám. Fyrirbæri sem eru ein helsta afturför sem nútíma femínismi stendur frammi fyrir þar sem þau stuðla með mjög öflugum hætti að kynferðislegri undirskipun kvenna. Klámvæðingin gengur út á það að konur eru skipaðar í einhvers konar þjónustuhlutverk þar sem þeim er fyrst og fremst gert að gleðja karlmenn bæði sjónrænt og líkamlega og hrelliklám er mjög skýr birtingarmynd þess að margir karlar telja sig vera í rétti til þess að „neyta‟ kvenlíkamans hvar og hvenær sem þeim sýnist, algjörlega óháð samþykki. En ykkar kynslóð hefur svo sannarlega sýnt það í verki við hin ýmsu tilefni, að þið eruð óhrædd við að bjóða kynjamisréttinu birginn og þessi samkoma hér í dag er einmitt mjög gott dæmi um það. Ég er því alveg óendanlega þakklát fyrir þetta frumkvæði ykkar og ég fer héðan bjartsýnni en oft áður um að mögulega muni ég, eða a.m.k. dætur mínar, lifa þann dag þegar fullu jafnrétti kynjanna verður náð. Áfram stelpur!

---

Fyrrverandi nemendur VMA Íslandsmeistarar í málmsuðu

October 26, 2016, 12:00 am

≫ Next: Landsbankinn færir VMA tölvubúnað að gjöf

≪ Previous: Þurfum að ná fram nauðsynlegum viðhorfsbreytingum

$

0

0

Tveir fyrrverandi nemendur í málmiðnaðardeild VMA gerðu það gott á Íslandsmótinu í málmsuðu sem haldið var nýverið. Andre Sandö varð Íslandsmeistari í pinnasuðu og Arnar Freyr Gunnarsson varð Íslandsmeistari í ryðfrírri TIG-suðu. Gústaf Adólf Hjaltason, verkefnastjóri hjá Iðunni og varaformaður Málmsuðufélags Íslands, sem stendur árlega fyrir keppninni, afhenti þeim Andre og Arnari Frey viðurkenningar sínar í húsnæði málmiðnaðardeildar í VMA í gær. Viðstaddir voru forráðamenn skólans, kennarar við deildina og fleiri gestir. Andre Sandö lauk stálsmíðanámi sínu í VMA vorið 2015 og starfar hann núna hjá Útrás ehf. á Akureyri. Hann stefnir á að taka meistaraskólann síðar. Arnar Freyr Gunnarsson lauk stálsmíðanámi sínu í VMA árið 2005 en hefur síðan síðan starfað í faginu, núna er hann annar eigenda og framkvæmdastjóri Norðurstáls ehf. á Akureyri. Meistaraskólanum lauk Arnar Freyr í fjarnámi í VMA árið 2013. Úrslit í Íslandsmótinu í málmsuðu 2016 urðu eftirfarandi: Samanlagður árangur: 1. Sigurður Guðmundsson, VHE 2. Georg Sebastian Popa, VHE 3. Guðmundur Loftur Erlingsson, VHE Pinnasuða: 1. Andre Sandö, Útrás ehf. Akureyri 2. Georg Sebeastian Popa, VHE 3. Ott Lesek, Stálsmiðjunni Framtaki ehf. Magsuða svart: 1. Guðmundur Loftur Erlingsson, VHE 2. Jakob Lárusson, Marel 3. Alfredo Estell, Stálsmiðjunni Framtaki ehf. Logsuða: 1. Hilmar Frímannsson, N1 Píparinn 2. Sigurður Guðmundsson, VHE 3. Guðmundur Loftur Erlingsson, VHE Tigsuða ryðfrítt 1. Arnar Freyr Gunnarsson, Norðurstáli ehf. Akureyri 2. Sigurður Guðmundsson, VHE 3. Georg Sebastian Popa, VHE

Landsbankinn færir VMA tölvubúnað að gjöf

October 27, 2016, 12:00 am

≫ Next: Sýna skúlptúra í Gallery Glugg

≪ Previous: Fyrrverandi nemendur VMA Íslandsmeistarar í málmsuðu

$

0

0

Landsbankinn á Akureyri hefur fært VMA að gjöf tölvubúnað sem nýtist mjög vel í skólastarfinu, enda mikil þörf fyrir endurnýjun tölvubúnaðar í skólanum. Annars vegar er um að ræða 10 tölvur og hins vegar 30 skjái. Sigríður Huld Jónsdóttir, skólameistari VMA, segist afar þakklát Landsbankanum á Akureyri fyrir þessa gjöf. Lengi hafi verið mikil þörf fyrir endurnýjun tölvubúnaðar skólans enda sé hann að meðaltali níu ára gamall. Hins vegar hafi ekki fengist fjárveiting frá ríkinu til nauðsynlegrar endurnýjunar á tölvum skólans og því sé þessi þessi höfðinglega gjöf Landsbankans afar kærkomin. Tölvubúnaðurinn – bæði tölvurnar tíu, sem séu allar ágætlega öflugar, og skjáirnir - sé nú þegar kominn í notkun. Arnar Páll Guðmundsson, útibússtjóri Landsbankans á Akureyri, segir að bankinn hafi ekki haft not fyrir þessar tölvur og skjáina og þegar forráðamenn bankans hafi haft spurnir af því að mikil þörf væri fyrir endurnýjun tölvubúnaðar í Verkmenntaskólanum hafi verið afar ánægjulegt að geta lagt skólanum lið með þessum hætti. Á meðfylgjandi mynd eru Arnar Páll Guðmundsson, útibússtjóri, (til vinstri), Sigríður Huld Jónsdóttir, skólameistari VMA, og Lárus Sverrisson, þjónustustjóri einstaklingsviðskipta Landsbankans á Akureyri.

Sýna skúlptúra í Gallery Glugg

October 28, 2016, 12:00 am

≫ Next: Þrjár sýningar á Hryllingsbúðinni um helgina - búið að bæta við tveimur sýningum

≪ Previous: Landsbankinn færir VMA tölvubúnað að gjöf

$

0

0

Þessa dagana stendur yfir sýning í Gallery Glugg á ganginum í VMA þar sem til sýnis eru skúlptúrar sem nemendur í áfanganum MYNL2SK05 hafa unnið. Skúlptúrarnir eru innblásnir af verkum Ásmundar Sveinssonar myndhöggvara. Kennarar í áfanganum eru Helga Jónasardóttir og Arna Valsdóttir og að þessu sinni sýnir hluti nemendanna í áfanganum verk sín en síðan verður þessum verkum skipt út fyrir verk hinna nemendanna í áfanganum. Þegar þessi verk nemendanna eru skoðun má glögglega þekkja nokkrar þekktar fyrirmyndir þeirra eftir Ásmund Sveinsson. Nemendurnir sem sýna verk sín eru Birna Eyvör Jónsdóttir, Gunnar Björn Ólafsson, Heimir Sindri Þorláksson, Hrafnhildur M Ríkharðsdóttir, Kristján Breki Björnsson, Kristján Loftur Jónsson, Maj Britt Anna Bjarkardóttir, Viktor Jort Hollanders og Össur Hafþórsson. Áfanginn er MYNL2SK05 - skúlptúr myndlistarbraut. Nemendur sem sýna eru: Birna Eyvör Jónsdóttir, Gunnar Björn Ólafsson, Heimir Sindri Þorláksson, Hrafnhildur M Ríkharðsdóttir, Maj Britt Anna Bjarkardóttir, Viktor Jort Hollanders og Össur Hafþórsson.

Þrjár sýningar á Hryllingsbúðinni um helgina - búið að bæta við tveimur sýningum

October 28, 2016, 12:05 am

≫ Next: Dagskrá jafnréttis- og mannréttindaviku í VMA 31. október - 4. nóvember

≪ Previous: Sýna skúlptúra í Gallery Glugg

$

0

0

Í kvöld, föstudag, kl. 20 verður þriðja sýningin á Litlu hryllingsbúðinni í uppfærslu Leikfélags VMA í Samkomuhúsinu. Tvær fyrstu sýningarnar voru um síðustu helgi og tókust gríðarlega vel, sýningin fékk frábærar viðtökur. Á morgun, laugardag, verða tvær sýningar á Litlu hryllingsbúðinni, annars vegar kl. 19 og hins vegar kl. 22. Fyrir þá sem ekki komust á sýninguna um síðustu helgi og komast heldur ekki í Samkomuhúsið í kvöld eða annað kvöld er vert að undirstrika að búið er að bæta við tveimur sýningum sem verða að viku liðinni, föstudagskvöldið 4. nóvember og laugardagskvöldið 5. nóvember. Báðar sýningarnar hefjast kl. 20. Sindri Snær Konráðsson, sem er í burðarhlutverkinu Baldri í Litlu hryllingsbúðinni, segir að fyrstu tvær sýningarnar hafi gengið mjög vel. „Þetta gekk var virkilega vel og við sem komum að sýningunni vorum bara mjög sátt. Og ég heyrði ekki annað en að áhorfendur væru einnig mjög ánægðir, í það minnsta fengum við mjög góðar viðtökur,“ segir Sindri Snær og hlakkar til sýninganna þriggja um helgina. Verð aðgöngumiða er kr. 3.490 en Þórdunu- og Huginsfélagar (nemendafélög VMA og MA) fá miðann á 3000 kr. gegn framvísun nemendaskírteina í miðasöluninni í Menningarhúsinu Hofi. Miðasala er annars vegar á mak.is og hins vegar tix.is.

Dagskrá jafnréttis- og mannréttindaviku í VMA 31. október - 4. nóvember

October 28, 2016, 12:15 am

≫ Next: Málmurinn ekkert síður fyrir stelpur en stráka

≪ Previous: Þrjár sýningar á Hryllingsbúðinni um helgina - búið að bæta við tveimur sýningum

$

0

0

JAFNRÉTTIS- OG MANNRÉTTINDAVIKA VMA 31. okt – 4. nóv 2016 Mán 31. okt Þri 1. nóv Mið 2. nóv Fim 3. nóv Fös 4. nóv 8:15 - 9:40 Heimilda-mynd Börn í stríði – umræður D-15 Heimilda-mynd Börn og vinnuþrælkun umræður D-15 9:55 - 11:20 Zane Alþj. Ak M-01 Hildur – Hrelliklám M-01 11:25 - 12:50 Kalli og Kári kl. 12:00 – 13:00 M-01 HIN Norðurland M-01 Húðflúr Finna stofu Bókasafn Leshringur Slútt 12:50 Gryfjan 13:15 - 14:40 Rauði krossinn M-01 Jafnréttis Stofa M-01 Amnesty Magnús M-01 Búsetu-deild – Þjónandi leiðsögn M-01 14:45 - 16:10 Heimilda-mynd M-01 LÖNGU Setning Skólameistari Gryfjan Örn Syngur Gryfjan Vala Syngur Gryfjan Keppni milli nem og kenn Gryfjan KVÖLD Feminista-félög VMA og MA á kaffi Ilm kl. 20:00 Bíó og popp kl. 20:00 M-01 JAFNRÉTTIS- OG MANNRÉTTINDAVIKA Í VMA 31. OKT – 4. NÓV 2016 31. okt – MÁNUDAGUR 9:40 – Gryfjan: Sigríður Huld ræðir við nemendur um jafnréttisstefnu skólans og verkefni sem skólinn er að taka þátt í með jafnréttisstofu. 12:00 – 13:00 – M-01: Kalli (fyrrum nemandi á starfsbraut) og Kári aðstoðarmaður hans segja frá lífi Kalla og samskiptum hans með aðstoð tölvu. - takið eftir tímasetningunni... 13:15 – M-01: Rauði krossinn með kynningu á starfi sínu með sérstakri áherslu á þau verkefni sem við getum tekið þátt í. 14:45 – M-01: Heimildamynd 1. nóv – ÞRIÐJUDAGUR 8:15 – D-15: Heimildamynd um börn í stríði og umræður 9:40 – Gryfjan: Örn Smári syngur 11:25 – M-01: Hin norðurland 13:15 – M-01: Jafnréttisstofa 20:00 – Kaffi Ilmur: Feministafélög VMA og MA spjalla (allir velkomnir) 2. nóv – MIÐVIKUDAGUR 9:40 – Gryfjan: Vala syngur 9:55 – M-01: Fyrirlestur Zane frá Alþjóðaskrifstofu Akureyrar 11:25 - ??: Fyrirlestur frá Húðflúrstofu norðurlands – líkamsímynd, staðalmyndir og fordómar 13:15 – M-01: Fyrirlestur Magnúsar frá Amnesty 3. nóv – FIMMTUDAGUR 8:15 – D-15: Heimildamynd um barnaþrælkun og umræður 9:40 – Gryfjan: Söngatriði úr Litlu hryllingsbúðinni 11:25 – Bókasafn: Leshringur 13:15 – M-01: Þjónandi leiðsögn – Kiddi Torfa 20:00 – M-01: Bíó og popp 4. nóv – FÖSTUDAGUR 9:40 – Gryfjan: Eitthvað á milli nemenda og kennara 9:55 – M-01: Fyrirlestur Hildar Friðriksdóttur um hrelliklám 12:50 – Gryfjan: Slútt

Málmurinn ekkert síður fyrir stelpur en stráka

October 31, 2016, 12:00 am

≫ Next: Hvað liggur að baki?

≪ Previous: Dagskrá jafnréttis- og mannréttindaviku í VMA 31. október - 4. nóvember

$

0

0

Einhverra hluta vegna virðist ganga erfiðlega að brjóta niður þá ímynd að ákveðnar námsgreinar séu karlagreinar og aðrar kvennagreinar. Gott dæmi um þetta er að af þeim tugum nemenda sem hófu nám í grunndeild málmiðnaðar sl. haust voru aðeins þrjár konur, þar af er ein þeirra sextán ára gömul og kom beint að loknum 10. bekk grunnskóla. Hún er frá Húsavík og heitir Ragnhildur Halla Þórunnardóttir. „Ég held að megi segja að frá því í níunda bekk grunnskóla hafi ég verið ákveðin í því að fara í þetta nám. Líklega fékk ég áhuga á þessu vegna þess að pabbi minn er vélvirki og ég hef fengið tækifæri til þess að kynnast því sem hann var að gera. Stefnan hjá mér núna er að ljúka grunndeildinni og í framhaldinu langar mig að fara í vélfræðinginn og mögulega síðar í iðnaðarverkfræði,“ segir Ragnhildur Halla. En af hverju fara ekki fleiri stelpur í málmiðnaðarfög? Ragnhildur Halla segir erfitt að svara því en stelpum finnist almennt að þetta sé strákanám. Því er hún ekki sammála og segir að málmiðnaðarbrautin sé ekkert síður fyrir stelpur en stráka. „Þessi verklegi hluti finnst mér mun áhugaverðari en sá bóklegi. Mér finnst mjög gaman að vinna með vélar og fá skilning á því hvernig þær virka. Auðvitað getur þetta verið óþrifalegt en það er eitthvað sem fylgir þessu bara,“ segir Ragnhildur Halla. Hún býr á heimavistinni og kann því vel. „Mér líkar vel að búa á vistinni. Vissulega voru töluverð viðbrigði að flytja hingað frá Húsavík en það var bara gaman að breyta til,“ segir Ragnheiður Halla Þórunnardóttir.

Hvað liggur að baki?

November 1, 2016, 12:00 am

≫ Next: Byggingadeild VMA í Sögum af landi

≪ Previous: Málmurinn ekkert síður fyrir stelpur en stráka

$

0

0

Almar Alfreðsson vöruhönnuður heldur þriðjudagsfyrirlestur í dag, 1. nóvember, kl. 17:00-17:40 í Ketilhúsinu á Akureyri. Yfirskrift fyrirlestursins er Hvað liggur að baki? Í fyrirlestrinum fjallar Almar um af hverju vöruhönnun varð fyrir valinu, Jón í lit ævintýrið, Sjoppulífið og hvernig sögur og tilfinningar veita honum innblástur við hönnun. Aðgangur er ókeypis og öllum heimill. Almar útskrifaðist með BA-gráðu í vöruhönnun frá Listaháskóla Íslands 2011. Hann hefur frá 2012 eingöngu unnið sem vöruhönnuður og rekur ásamt eiginkonu sinni hönnunarfyrirtækið Almar vöruhönnun, en það framleiðir meðal annars Jón í lit. Einnig eiga þau hjónin minnstu og einu hönnunarsjoppu landsins, Sjoppuna vöruhús, sem staðsett er í Listagilinu. Fyrirlesturinn í dag er í röð fyrirlestra síðdegis á þriðjudögum í vetur og er um að ræða samvinnuverkefni Listasafnsins á Akureyri, Gilfélagsins, VMA, Myndlistarfélagsins og Háskólans á Akureyri.

---

Byggingadeild VMA í Sögum af landi

November 1, 2016, 2:11 am

≫ Next: Síðasti skiladagur texta í Ungskáld er 10. nóvember

≪ Previous: Hvað liggur að baki?

$

0

0

Í þættinum Sögur af landi á Rás 1 Ríkisútvarpsins á dögunum heimsótti Þórgunnur Oddsdóttir dagskrárgerðarkona byggingadeild VMA og fræddist um námið og byggingu sumarbústaðarins sem nú er í gangi hjá brautarstjóranum Halldóri Torfa Torfasyni og nemendunum Hafþóri Grant og Rögnvaldi Stefánssyni. Hér er hægt að hlusta á umfjöllunina.

Síðasti skiladagur texta í Ungskáld er 10. nóvember

November 1, 2016, 11:55 pm

≫ Next: Góðir gestir frá Þrándheimi

≪ Previous: Byggingadeild VMA í Sögum af landi

$

0

0

Sem fyrr er nú efnt til ritlistarsamkeppni ungs fólks á aldrinum 16-25 ára á Norðurlandi eystra undir yfirskriftinni „Ungskáld“. Samkeppnin tekur til texta af ýmsum toga – ljóð, sögur, leikrit o.s.frv. – en skilyrðið er að hann sé ritaður á íslensku. Skil á texta er á netfangið ungskald@akureyri.is og þar komi einnig fram nafn höfundar. Síðasti skiladagur er 10. nóvember nk.. Það eru því átta dagar til stefnu. Veitt verða þrenn peningaverðlaun fyrir bestu textana, fyrir 1. sæti kr. 50.000, fyrir 2. sæti kr. 30.000 og fyrir 3. sæti kr. 20.000. Liður í þessu ritlistarátaki var námskeið sem efnt var til 8. Október sl. þar sem akureyrski rapparinn, Atli Sigþórsson, betur þekktur sem Kött grá pje, leiðbeindi ungum og upprennandi rithöfundum í skapandi skrifum. Þótti námskeiðið takast mjög vel og er þess því vænst að þátttakan í samkeppninni verði góð. Að „Ungskáldum“ standa framhaldsskólarnir á Akureyri, Menntaskólinn á Tröllaskaga, Framhaldsskólinn á Húsavík, Akureyrarstofa, Amtsbókasafnið á Akureyri, Húsið og Sóknaráætlun Norðurlands eystra.

Góðir gestir frá Þrándheimi

November 2, 2016, 12:00 am

≫ Next: Opið fyrir umsóknir um skólavist fyrir vorönn 2017

≪ Previous: Síðasti skiladagur texta í Ungskáld er 10. nóvember

$

0

0

Síðastliðinn sunnudag komu til Akureyrar fjórar stúlkur, textílnemendur, ásamt kennara sínum frá framhaldsskólanum Charlottenlund í Þrándheimi í Noregi og munu þær dvelja á Akureyri þessa viku og næstu og kynna sér námið í VMA auk þess að heimsækja gallerí og ýmsar listasmiðjur á Akureyri. Ferðin er styrkt af Erasmus. Undanfarin ár hefur verið mjög gott samstarf milli Charlottenlund og VMA, enda skólarnir á margan hátt svipaðir, með blöndu af verklegu og bóklegu námi. Bæði nemendur og kennarar frá báðum skólum hafa skipst á heimsóknum og fóru sex textílnemendur frá VMA ásamt tveimur kennurum til Þrándheims í septemer sl. og kynntu sér námið þar og heimsóttu listasmiðjur í borginni. Tókst sú ferð með miklum ágætum og voru þátttakendur í ferðinni mjög ánægðir með hvernig til tókst. Og nú er VMA sem sagt gestgjafinn og sl. mánudag komu stúlkurnar ásamt kennara sínum, Halldis Berg, í skólann og hafa nú þegar kynnt sér og tekið þátt í fjölbreyttum kennslustundum á listnámsbraut. Og framundan er skemmtileg og fjölbreytt dagskrá með blöndu af kennslustundum í VMA og heimsóknum á söfn, gallerí og listasmiðjur á Akureyri. Og auðvitað verður tíminn einnig nýttur til skoðunarferða um nágrennið, t.d. er m.a. áætluð skoðunarferð í Mývatnssveit. Stúlkurnar fjórar frá Charlottenlund sem núna eru í heimsókn í VMA koma víða að úr Noregi, ein þeirra er frá Þrándheimi, önnur frá Tromsö og tvær frá minni stöðum í nágrenni Þrándheims. Þær eru á fyrstu önn í textílnáminu í Charlottenlund en í það heila er námið tvö ár auk tveggja ára á vinnustað. Námið í VMA er því töluvert frábrugðið því sem þekkist í Charlottenlund. Á meðfylgjandi mynd eru norsku stúlkurnar fjórar með kennara sínum. Standandi frá vinstri: Alhalabi Nour, Julie Johansen og Halldis Berg. Sitjandi frá vinstri: Andrea Vasseng og Anne Gausen Forve

Opið fyrir umsóknir um skólavist fyrir vorönn 2017

November 2, 2016, 9:31 am

≫ Next: Próftafla haustannar 2016

≪ Previous: Góðir gestir frá Þrándheimi

$

0

0

Umsóknarfrestur um vorönn 2017, er til 30. nóvember

Próftafla haustannar 2016

November 2, 2016, 3:17 am

≫ Next: Farsælt samstarf rafiðnaðardeildar við atvinnulífið

≪ Previous: Opið fyrir umsóknir um skólavist fyrir vorönn 2017

$

0

0

Hægt er að sjá próftöflu haustannar 2016 hér

Farsælt samstarf rafiðnaðardeildar við atvinnulífið

November 3, 2016, 12:00 am

≫ Next: Kennararnir á listnámsbrautinni höfðu mikil áhrif

≪ Previous: Próftafla haustannar 2016

$

0

0

Rafiðnaðardeild VMA hefur ætíð mætt miklum og góðum skilningi og notið velvildar atvinnulífsins – bæði á Akureyri og víðar. Þetta segir Óskar Ingi Sigurðsson, brautarstjóri rafiðnaðardeildar, og bætir við að þessi nánu tengsl deildarinnar við atvinnulífið séu afar mikilvæg, enda sé það sameiginlegt hagsmunamál skólans og atvinnulífsins að deildin sé vel sótt og vel tækjum búin þannig að kennslan sé markviss og góð. Rafiðnaðardeild VMA er núna og hefur undanfarin ár verið mjög vel sótt. Rafmagnið heillar, enda áhugavert nám og góðar atvinnuhorfur fyrir bæði rafvirkja og rafeindavirkja. Allir nemendur sem hefja nám við deildina fara í grunnnám sem tekur tvö ár – fjórar annir – og síðan velja nemendur á milli þess að fara í rafvirkjun og rafeindavirkjun. Reyndar taka sumir nemendur bæði rafvirkjun og rafeindavirkjun og standa því ennþá betur að vígi á vinnumarkaðnum. Nám í rafeindavirkjun var endurvakið í VMA árið 2012. Hér í gamla daga var stór hluti af starfi þeirra að gera við t.d. sjónvörp og hljómflutningstæki sem og ýmsan rafeindastýrðan búnað um borð í fiskiskipum. Í dag hefur starf rafeindavirkjanna færst meira inn í tölvuheiminn – tölvustýringar og hugbúnað. Skilin á milli rafvirkjunar og rafeindavirkjunar eru þó ekki alltaf greinileg en í stórum dráttum má segja að rafvirkjar séu í uppsetningum en rafeindavirkjarnir séu meira í því að kafa inn í raftækin og greina þau. Að loknu grunnnámi tekur við þriggja anna nám hjá bæði rafvirkja- og rafeindavirkjanemum og síðan þurfa nemendur að ljúka samningi hjá meistara. Í það heila er námið því fjögur ár og að loknum þessum tíma geta þeir farið í sveinspróf. Á þesssari önn hófu þrettán nám í rafeindavirkjun og er þetta þriðji hópurinn sem hefur þetta nám síðan 2012. Frá þeim tíma hefur VMA útskrifað 22 rafeindavirkja. Nýverið fékk rafiðnaðardeild 15 lóðstöðvar og jafnmörg mælingaskóp sem deildin keypti fyrir fjármuni sem Félag rafeindavirkja færði deildinni að gjöf þegar nám í rafeindavirkjun var endurvakið árið 2012. Óskar Ingi Sigurðsson segir mikinn feng fyrir deildina að fá þennan tækjabúnað og hann nýtist vel í kennslustofunni sem nemendur í rafeindavirkjun hafa til umráða í skólanum. Í júní sl. færðu Raftákn á Akureyri og Rönning rafiðnaðardeild VMA hálfa aðra milljón króna að gjöf í tilefni af 40 ára afmæli Raftákns á Akureyri og skyldi peningagjöfinni varið til kaupa á kennslubúnaði í ljósastýringarkerfum. Fálkinn hefur ákveðið að gefa deildinni uppfærslu á hugbúnaði fyrir iðnaðartölvur (leyfisskyldur hugbúnaður) og verður gjöfin afhent fljótlega. Þá hefur Ljósgjafinn á Akureyri gefið deildinni á ári hverju handverkfæri að andvirði allt að 100 þúsund krónur. Og heildsölufyrirtækin í rafiðnaðargeiranum á Akureyri – Rönning og Ískraft - hafa jafnan sýnt rafiðnaðardeild VMA mikinn velvilja með ýmsum gjöfum og stuðningi. „Við höfum notið mikils velvilja hjá atvinnulífinu og við höfum á allan hátt átt mjög gott samstarf við það. Nemendum frá okkur sem hafa farið í vinnustaðaheimsóknir hefur alltaf verið vel tekið og einnig hefur almennt ríkt ánægja hjá fyrirtækjunum með þá nemendur sem hafa útskrifast frá okkur,“ segir Óskar Ingi Sigurðsson. Eins og komið hefur fram er nú unnið að því að standsetja svokallaða FAB-Lab smiðju í VMA og hefur henni verið fundið húsnæði í tveimur kennslustofum sem rafiðnaðardeildin hafði til afnota. Í stað þessara kennslustofa hefur deildin fengið afnot af þremur kennslustofum á C-gangi skólans og komið þar fyrir ýmsum búnaði sem nýtist vel fyrir nám í rafvirkjun.

Kennararnir á listnámsbrautinni höfðu mikil áhrif

November 3, 2016, 11:55 pm

≫ Next: Síðustu sýningar á Litlu hryllingsbúðinni um helgina

≪ Previous: Farsælt samstarf rafiðnaðardeildar við atvinnulífið

$

0

0

Það er ávallt gaman að fylgjast með því hvaða slóð útskrifaðir nemendur frá VMA feta í framhaldinu. Úlfur Logason, einn nemendanna sem útskrifuðust af listnámsbraut VMA sl. vor, fór beint áfram í framhaldsnám í myndlist og bar niður í Düsseldorf í Þýskalandi. Í nýjasta tölublaði Framhaldsskólablaðiðsins er áhugavert viðtal við tvö ungmenni frá Akureyri, Úlf Logason og Karolínu Rós Ólafsdóttur, nema í MA, sem bæði hneigjast til listsköpunar. Yfirskrift greinarinnar er Ung list á Akureyri og þar ræða þau fram og til baka um listina og hvernig hafi verið að alast upp sem ungir listamenn á Akureyri. Bæði segja þau aðstöðuna góða á Akureyri, miðað við stærð bæjarins, og að ekki sé skortur á fyrirmyndum. Úlfur gefur listnámsbraut VMA afar góða einkunn og segir „kennarana á listnámsbrautinni í VMA hafa haft mikil áhrif og segir að ef ekki væri fyrir verknám á Akureyri væri hann líklegast ekki með stúdentspróf.“ Svo mörg voru þau orð. Sannarlega ánægjulegt að fá góða umsögn frá fyrrum nemendum. Gangi Úlfi sem allra best í sínu framhaldsnámi í Þýskalandi!

---

Síðustu sýningar á Litlu hryllingsbúðinni um helgina

November 4, 2016, 12:00 am

≫ Next: Kunna vel við rafmagnið

≪ Previous: Kennararnir á listnámsbrautinni höfðu mikil áhrif

$

0

0

Um helgina verða síðustu sýningar á uppfærslu Leikfélags VMA á söngleiknum Litlu hryllingsbúðinni. Sýningarnar verða í kvöld, 4. nóvember, og annað kvöld, 5. Nóvember, kl. 20, bæði kvöldin, í Samkomuhúsinu. Hryllingsbúðin hefur verið sýnd tvær síðustu helgar og fengið glimrandi fínar viðtökur. Nú er sem sagt síðasta tækifærið til að sjá sýninguna! Verð aðgöngumiða er kr. 3.490 en Þórdunu- og Huginsfélagar (nemendafélög VMA og MA) fá miðann á 3000 kr. gegn framvísun nemendaskírteina í miðasöluninni í Menningarhúsinu Hofi. Miðar eru sem sagt seldir í Hofi og einnig á netinu á mak.is og tix.is.

Kunna vel við rafmagnið

November 6, 2016, 11:00 pm

≫ Next: Viðtal við Ragnhildi Höllu í Fréttablaðinu

≪ Previous: Síðustu sýningar á Litlu hryllingsbúðinni um helgina

$

0

0

Það er gömul saga og ný að í sumum námsgreinum eru konur í miklum meirihluta en í öðrum eru karlar í meirihluta. Rafiðngreinar eru í hópi þeirra námsgreina sem karlar eru í miklum meirihluta nemenda. Að loknu grunnnámi rafiðnaðardeildar, sem tekur fjórar annir, skiptast nemendur í annars vegar rafvirkjun og hins vegar rafeindavirkjun. Núna eru tvær konur á fyrstu önn af þremur í rafvirkjun að loknu grunnnáminu – Aldís Ósk Agnarsdóttir, 21 árs Bárðdælingur, og Lilja Hólm Jóhannsdóttir, 31 árs Akureyringur. Báðar eru þær afar sáttar við námið og finnst það mjög áhugavert. Þær kannast vel við að stúlkum finnist rafvirkjun vera karlastarf, en það segja þær hinn mesta misskilning, það sé ekkert síður fyrir konur. En ranghugmyndirnar um námið og starf rafvirkja eru til staðar, segja þær, og stóra spurningin sé hvernig eigi að brjóta niður þessa ímyndarmúra. Svarið við þeirri spurningu segjast þær ekki hafa á takteinum en ímynda sér að það þurfi á enn markvissari hátt að kynna námið og fagið fyrir stelpum Lilja Hólm fór í gegnum grunndeild rafiðnaðar í VMA og fór síðan beint áfram í rafvirkjanámið. Hún er með rafmagnið í blóðinu, ef svo má segja, því bæði faðir hennar, Jóhann Ólafsson, og afi hennar, Ólafur Jónsson, fóru þessa leið og raunar rekur faðir hennar í dag fyrirtækið Ljósco ehf á Akureyri og þar hefur Lilja unnið á sumrin og einnig með skólanum þegar tími gefst. „Þetta hefur bara verið mjög skemmtileg og góð reynsla,“ segir Lilja og hvetur stúlkur til þess að gaumgæfa vel þetta nám. Lilja og maður hennar, Jón Friðrik Þorgrímsson, veitingastjóri á Hótel Kea, eiga tvær dætur. Auk heimilisstarfanna er dagskráin þéttskipuð í skólanum og síðan tekur vinnan á Ljósco við. Dagarnir eru því oft langir og strangir en Lilja segir að það vel þess virði. Hún sér ekki annað fyrir sér en að starfa sem rafvirki í framtíðinni en aldrei sé þó að vita nema hún bæti við sig frekara námi. Aldís Ósk Agnarsdóttir flutti suður yfir heiðar árið 2011 og tók þar grunnámið í rafvirkjun. Mál æxluðust síðan þannig að hún útskrifaðist sem náttúrufræðistúdent og skellti sér í verkfræði í HR en fann sig ekki í henni, verklegt nám togaði í hana. Hún og unnusti hennar, Bjartmar Bergmann, sem hefur lokið sveinsprófi í rafvirkjun og er nú að afla sér meistararéttinda í faginu, kynntust í Tækniskólanum og þau ákváðu að flytja norður yfir heiðar fyrr á þessu ári og setja sig niður á Akureyri. Þrátt fyrir að hafa ekki lokið námi í rafvirkjun hefur Aldís Ósk nú þegar starfað töluvert í þessum geira, því meðfram skólanum í Reykjavík starfaði hún sem rafeindavirki hjá Marel. Og til hliðar við rafvirkjanámið í VMA aflar hún sér bókhaldsþekkingar í fjarnámi við Háskólann í Reykjavík. Hún segir það ekkert launungarmál að hún og Bjartmar unnusti hennar stefni að því að hefja rekstur eigin rafverktakafyrirtækis á Akureyri. En áður en hún geti einhent sér í það hyggist hún ljúka við rafvirkjanámið í VMA. Það komi sér vel í rekstri slíks fyrirtækis að hafa rafvirkjaréttindin og vera vel að sér í bókhaldi.

Viðtal við Ragnhildi Höllu í Fréttablaðinu

November 7, 2016, 10:55 pm

≫ Next: Pamela Swainson með þriðjudagsfyrirlestur

≪ Previous: Kunna vel við rafmagnið

$

0

0

Viðtalið sem heimasíða VMA átti á dögunum við Ragnhildi Höllu Þórunnardóttur, nemanda í grunndeild málmiðnaðar, vakti athygli Fréttablaðsins og í blaðkálfi sem blaðið var með um málmiðnað í síðustu viku hafði blaðið viðtal við Ragnhildi og vitnaði til umfjöllunarinnar hér á heimasíðunni. Hér er viðtalið sem birtist hér á heimasíðunni við Ragnhildi.

Pamela Swainson með þriðjudagsfyrirlestur

November 7, 2016, 11:00 pm

≫ Next: VMA-nemar gera það gott í Voice Ísland

≪ Previous: Viðtal við Ragnhildi Höllu í Fréttablaðinu

$

0

0

Pamela Swainson, myndlistarkona, heldur þriðjudagsfyrirlestur í dag, 8. nóvember, kl. 17:00-17:40 í Ketilhúsinu á Akureyri. Yfirskrift fyrirlestursins er Familiar Strangers. Aðgangur að fyrirlestrinum er ókeypis og öllum heimill. Swainson fæddist í Manitoba í Kanada og er afkomandi fólks sem yfirgaf Ísland í kringum aldamótin 1900. Í fyrirlestrinum, sem fer fram á ensku, veltir hún fyrir sér spurningum um þjóðflutninga: Hver eru áhrifin á tengingu við stað, land, menningu og fjölskyldu? Hvað geymist í sálinni og flyst milli kynslóða? Fyrirlesturinn er kynning á sjónrænum könnunarleiðangri Swainson um tilfinningar, áföll og uppgötvanir og tengsl við fornar lendur. Fyrirlesturinn í dag er í röð fyrirlestra síðdegis á þriðjudögum í vetur og er um að ræða samvinnuverkefni Listasafnsins á Akureyri, Gilfélagsins, VMA, Myndlistarfélagsins og Háskólans á Akureyri.

VMA-nemar gera það gott í Voice Ísland

November 8, 2016, 11:00 pm

≫ Next: Veit fátt betra en lyktina af gömlum bókum

≪ Previous: Pamela Swainson með þriðjudagsfyrirlestur

$

0

0

Það verður ekki annað sagt en að VMA-nemendur geri það gott í sjónvarpsþættinum Voice Ísland í Sjónvarpi Símans. Þrír VMA-nemar eru komnir áfram í keppninni, Elísa Ýrr Erlendsdóttir, Sindri Snær Konráðsson og Valgerður Þorsteinsdóttir. Elísa Ýrr er í liði Unnsteins Manúels Stefánssonar, Valgerður í liði Svölu Björgvinsdóttur og Sindri Snær í liði Helga Björnssonar. Öll hafa þau Elísa Ýrr, Sindri Snær og Valgerður látið heldur betur að sér kveða í bæði söng- og leiklistarlífinu í VMA. Elísa Ýrr gerði sér lítið fyrir og sigraði bæði Söngkeppni VMA í febrúar sl. og hún vann sömuleiðis Söngkeppni framhaldsskólanna á Norður- og Austurlandi sl. vor í Hofi. Hér er umfjöllun um Söngkeppni VMA í Hofi. Elísa Ýrr söng sama lag í Voice Ísland og söngkeppnunum í Hofi, lag Amy Winehouse, You know I‘m no good. Hér er upptaka af flutningi Elísu Ýrr í Söngkeppni framhaldsskólanna á Norður- og Austurlandi í Hofi og hér er klippa af söng hennar í Voice Ísland. Sindri Snær hefur bæði látið að sér kveða í leiklistinni og söngnum. Hann hefur leikið og sungið í tveimur uppfærslum VMA á þessu ári, á vorönn í Bjart með köflum í Freyvangi og núna á haustönn í Litlu hryllingsbúðinni. Báðar þessar sýningar fengu fína dóma og aðsókn. Síðasta sýning á Hryllingsbúðinni var sl. laugardagskvöld. Hér er viðtal við Sindra á Mbl.is og upptaka af laginu Dimmar rósir sem Sindri Snær flutti í Voice Ísland, en það lag söng hann einmitt í Bjart með köflum. Sindri Snær tók þátt í Söngkeppni VMA sl. vetur og er hér mynd af honum í keppninni. Valgerður Þorsteinsdóttir hefur eins og Sindri bæði leikið og sungið í VMA. Hún söng í Söngkeppni VMA sl. vetur og lék og söng í Bjart með köflum snemma á þessu ári. Hún hefur í auknum mæli verið að leggja áherslu á sönginn, hefur verið í söngnámi og einnig verið að kynna sér upptökutækni, eins og kemur fram í viðtali við hana á heimasíðu VMA fyrir rösku ári. Hér er upptaka af söng Valgerðar í stúdíói og hér er upptaka af söng hennar á brautskráningu VMA í desember í fyrra, en þar söng hún eitt þeirra laga sem hún síðan söng í Bjart með köflum. Og hér er svo viðtal við Valgerði og upptaka af söng hennar í Voice Ísland í haust. Það verður sannarlega áhugavert að fylgjast með fulltrúum VMA í Voice Ísland í vetur.